بصو بقى انا كنت واحده من اللى زهقو من وصفات اطاله الشعر لان شعرى قصير لحد قبل الاكتاف اه تقيل وكثيف بس مش بيطول نهااااااااائى زى ما تقولو حالف ما يتحرك من مكانه وبيعاند واستخدمتله كل حاجه عشان يطول
مره يقولو اغلى الترمس واستعملى ميته (مفيش فايده)
ومره يقولو اغلى الياس دى بتطول وبتعمل الهوايل وغليته مجبش نتيجه
وكل يوم اسمع وصفه اطاله شكل اشى عين حمار زعلان واشى رجل ارنب مطلق واشى عرف ديك مقموص واشى ريش فرخه مخضوضه زهققققققققققققت وطهههههههققققققققت
وفى الاخر قريت موضوع فى النت عن فوايد عشبه الروزمارى اللى هوا اكليل الجبل اللى هوا الحصلبان
وكان بيقول :
اكليل الجبل ومشاكل الشعر:
لإكليل الجبل قيمة وشأن مع مشاكل الشعر حيث أنه يؤدي إلى تماسك الشعر ومنع سقوطه ومساعدته على النمو بسبب مساعدته للدم على الوصول والتدفق إلى الرأس
يعنى وظيفته الاساسيه انه بيوصل الدم اللى ماشى فى اجسامنا ومش معبر فروه راسنا نهائى لان طول ما الدم بيجرى تحت فروه الراس تاكدى من انه حامل كل الغذا ليها
وكالعاده قلت لنفسى خليك ورا الكداب لحد باب الدار (للاسف مقلوش لحد باب القسم كنت عرفت انتقم ههههههههه)
وفعلا حلفت محطش على شعرى لمده اسبوع بحاله غير الروزمارى ده
وجرى رحت للعطار قلتله هات ب5 جنيه قلت اكيد هايكون حبه صغيرين مدام العشبه دى مهمه اوى كده
لا بالعكس لاقيته حاططلى يجى كبشه جاروف كبيره لدرجه قلتله بس بس ده ياما اوىىىىىى انا مش هاستعمل كل ده
قالى بصوت يخوف (مش انتى اللى عايزه بخمسه جنيه )
المهم من غير لا اغسل شعرى ولا حاجه جرى عل البيت اخدت كنكه وحطيت فيها حبه روزمارى حلوين وكترت عشان يبقى مركز وغليته غليته لحد ما اتقطع نفسه حقيقى غليته بضمير لدرجه انه لما كان بيفور برفعه شويه لحد ما الفوران يروح وارجعه على النار تانى ههههههههه افترى بقى
واستنيته لما برد او بقى دافى وصفيته ودهنت بيه كل حته من فروه الراس والشعر وضفرت شعرى ودى كانت اول مره فى حياتى من حوالى عشرين سنه اضفر فيها شعرى يمكن الضفيره اللى ساعدتنى كمان انى الاقى النتيجه
ايوه الضفيره لانى كمان مره شوفت موضوع لاطول شعور فى صور بنات شعرهم طويل لاقيت العامل الوحيد المشترك ما بين كل الصور هيا الضفيره تقريبا معظمهم كانو مضفرينه حتى اللى فاكه الضفيره باين كسره الضفيره فى شعرها
(صدقونى اكبر غلطه بنرتكبها فى حق شعرنا اننا بمجرد ما بنحس اننا كبرنا بنفك الضفيره اللى امنا بتعملها وبيتوقف نمو الشعر واللهى افتكرانى من يوم ما وقفت الضفاير من الاعداديه وانا شعرى عمره ما شاف طول ابدااااااااااا وطبعا بنعمل حجه اننا كبرنا وان الضفيره بتكسر الشعر )
المهم عملت الضفيرتين زى اطفال الحضانه ونمت وفضلت كل يوم بليل وساعات كمان الصبح لما بيجيلى مزاج اعمل نفس الطريقه بس اهم حاجه قبل النوم لانه وقت نمو الشعر اهم حاجه انك لما تدهنى زيت او كريم تبعديهم عن فروه الراس تخلى بس الروزمارى هوا اللى فى الفروه واى دهان تانى يكون على الشعر من بره
وفعلا يا بنات النتيجه واقسم بالله بانت من اول اسبوع حسيت بال1سم اللى بسمع عنه بقالى سنين بيظهر وبيبان عليه الامان
فعلا واللهى غير النعومه والطرواه الزايدين عندى وكمان واللى خلانى اتاكد اكتر انى بقيت اتضايق من وجوده على كتفى مده واضطر المه مكنتش بضايق من شعرى نهااااااااااائى غير لما استعملت الروزمارى ده حقيقى حسيت بفرق رهيب وكمان الضفيره اللى كنت بضفرها وكانت قصيره فى ايدى بقيت بضفرها مده وبتاخد منى وقت وده كله من اول اسبوع تخيلو اهم حاجه تستمرى اسبوع متواصل متزهقيش وبعد ما الاسبوع يخلص ابقى احكمى بنفسك ولو اهملتى يوم من الاسبوع يبقى انتى اللى قصرتى وعادى ادهنى راسك من الزيت او الكريم اللى بترتاحيلهم بس اهم حاجه تكون فروه الراس مشبعه بميه الروزمارى
اسفه طولت عليكو بس حبيت احكى التجربه الحلوه دى للناس اللى يأسو من ان شعرهم يطول | 
موضوع: لإطاله الشعر بطريقه صاروخيه 
الأحد مارس 13, 2011 9:22 am
