*خزنتى بطاطس ولالسه ؟؟؟؟؟؟؟؟؟؟؟

السلام عليكم

يارب تكونو بخير ومن احسن لاحسن دايما يارب

بعد نجاح موضوع خزنتى ليمون ولا لسه وبعد ما اللمون غلى والبنات كتبوا لى انه اللمون وصل ب6 ج قبل ما يقروا الموضوع

فانا قلت اكتب الموضوع ده بدرى شوية عشان اكبر عدد يستفيد ومعلش رغيت كتير ندخل فى المهم

كلنا بنحب البطاطس المقلية وبنشتريها نصف مقلية لما تغلى طب مااحنا نعملها ونخزنها ونلاقيها ساعة ما نعوزها

فى ناس بتقيلها نص قلية وتشيلها فى اكياس فى الفريزر وترجع تكمل قليها بعد ما تطلعها وقت عوزتها

والطريقة دى بتخلى البطاطس تشرب زيت كتير وده مش صحى

طريقتى انا بئى اننا بعد ما نقطع البطاطس نسلقها لمدة 6 دقايق تقريبا فى ميه بتغلى على النار مسبقا وعليها ربع كوب خل

او كوب ماء بارد وندوب فيه معلقتين كبار نشا ونضيفه للميه اللى بتغلى زى المهلبية بس خفيفة

وبعد ما تفور البطاطس وتاخد غلوة واحدة تقريبا نصفيها فى مصفى ونغسلها بمية الحنفية ونسيبها تصفى الميه ونعبيها فى الاكياس وعلى الفريزر على طول ولما نعوز ها نطلعها نغسلها بالميه السخنة او الباردة من الحنفية ونقليها على طول

الطريقة دى هايلة بتخلى البطاطس مقرمشة جدا ومتشربش زيت خالص

واحلى حاجة انى اقدر اقطع البطاطس حلقات للصوانى او مكعبات للسلق والهرس بيوريه يعنى

او لعمل سلطة البطاطس يعنى مش بس مقلية لأ دى استخدامها زى البطاطس الطازة تماما

بعض الملحوظات عالماشى

1-لتسهيل حك البطاطس بدل تقشيرها انقعى البطاطس 5 دقايق فى ميه سخنة وبعدين حكيها عشان تحتفظى بالاملاح المعدنية والحديد اللى تحت طبقة القشر وتكونى محضرة اناء به ماء بارد تغطسى البطاطس فيه مباشرة بعد الحك عشان متسودش

2-عند القلى سواء بطاطس اوغيرها غطى الطاسة عشان تسرعى عملية النضج بالبخار وعشان تحافظى على نظافة المطبخ من بخار الزيت

3-عند تعبئة البطاطس فى اكياس قبل التخزين فى الفريزر بلاش تكوميها على بعض فى الكيس عشان متعملش كتلة وافرديها وبططى الكيس من برة عشان يسهل خلعها من بعض ويسرع عملية القلى وده انا بعمله فى اى حاجة هدخلها الفريزر

4- طبعا كلنا بنطلع البطاطس على ورق تنشيف للتخلص من الزيت الزائد
5-ياريت نستنى شوية ومنخزنش البطاطس دلوتى الشهر اللى جاى تكون البطاطس احسن وجودتها اعلى من البطاطس اللى فى السوق الان وكمان يكون سعرها نزل شوية بس تابعو انتم السعر لانى مبنزلش كتير ومعرفش اخر التطورات

شكرااااااااااااا لسعة صدوركم

بالتوفيق ان شاء الله

» *3 -خزنتى برتقال ولا لسه
» .... بطاطس مقرمشة من برة وطرية من جوة ....